อกุสลสมุฏฺฐานํ รูปํ อกุสลมูเลน เอกมูลํ, น อกุสลํฯ อกุสลํ อกุสลมูเลน เอกมูลญฺเจว อกุสลญฺจฯ
[64] (ก) เย เกจิ อกุสลมูเลน เอกมูลา ธมฺมา, สพฺเพ เต อกุสลมูเลน อญฺญมญฺญมูลาติ?
มูลานิ ยานิ เอกโต อุปฺปชฺชนฺติ อกุสลมูลานิ เอกมูลานิ เจว อญฺญมญฺญมูลานิ จฯ อวเสสา อกุสลมูลสหชาตา ธมฺมา อกุสลมูเลน เอกมูลา, น จ อญฺญมญฺญมูลาฯ
(ข) เย วา ปน อกุสลมูเลน อญฺญมญฺญมูลา, สพฺเพ เต ธมฺมา อกุสลาติ? อามนฺตาฯ
(2) มูลมูลนโย
[65] (ก) เย เกจิ อกุสลา ธมฺมา, สพฺเพ เต อกุสลมูลมูลาติ?
ตีเณว อกุสลมูลมูลานิฯ อวเสสา อกุสลา ธมฺมา น อกุสลมูลมูลาฯ
(ข) เย วา ปน อกุสลมูลมูลา, สพฺเพ เต ธมฺมา อกุสลาติ? อามนฺตาฯ
[66] (ก) เย เกจิ อกุสลา ธมฺมา, สพฺเพ เต อกุสลมูเลน เอกมูลมูลาติ?
อเหตุกํ อกุสลํ อกุสลมูเลน น เอกมูลมูลํฯ สเหตุกํ อกุสลํ อกุสลมูเลน เอกมูลมูลํฯ
(ข) เย วา ปน อกุสลมูเลน เอกมูลมูลา, สพฺเพ เต ธมฺมา อกุสลาติ?
อกุสลสมุฏฺฐานํ รูปํ อกุสลมูเลน เอกมูลมูลํ, น อกุสลํฯ อกุสลํ อกุสลมูเลน เอกมูลมูลญฺเจว อกุสลญฺจฯ
[67] (ก) เย เกจิ อกุสลมูเลน เอกมูลมูลา ธมฺมา, สพฺเพ เต อกุสลมูเลน อญฺญมญฺญมูลมูลาติ?
มูลานิ ยานิ เอกโต อุปฺปชฺชนฺติ อกุสลมูลานิ เอกมูลมูลานิ เจว อญฺญมญฺญมูลมูลานิ จฯ อวเสสา อกุสลมูลสหชาตา ธมฺมา อกุสลมูเลน เอกมูลมูลา, น จ อญฺญมญฺญมูลมูลาฯ
(ข) เย วา ปน อกุสลมูเลน อญฺญมญฺญมูลมูลา, สพฺเพ เต ธมฺมา อกุสลาติ? อามนฺตาฯ
(3) มูลกนโย
[68] (ก) เย เกจิ อกุสลา ธมฺมา, สพฺเพ เต อกุสลมูลกาติ?
อเหตุกํ อกุสลํ น อกุสลมูลกํฯ สเหตุกํ อกุสลํ อกุสลมูลกํฯ
(ข) เย วา ปน อกุสลมูลกา, สพฺเพ เต ธมฺมา อกุสลาติ?
อกุสลสมุฏฺฐานํ รูปํ อกุสลมูลกํ น อกุสลํฯ อกุสลํ อกุสลมูลกญฺเจว อกุสลญฺจฯ